Araw-araw
Binubulag ako ng mabining ngiti ng araw
upang haltakin ako palayo
sa yakap ng panaginip
Hinahagupit ng ngitngit
ng katanghaliang-tapat
upang lusawin ang mga pangarap
na nangungunyapit sa dulo ngkamalayang naiinip
Sinasakal ng nakasusulasok na usok
na bumabalot sa Kamaynilaan
ibinubuga ng mala-pugong mga tambutso
na nakikipaghabulan sa orasan
Gabi na, subalit andiyan pa rin ang alinsangan ng pag-iisa
Sinasakal ako ng kawalan
Hinahagupit ng kahungkagan
Niyayakap ng agam-agam
hanggang...bumuhos ang ulan
Sa una'y mahina, papalakas, papasinsin
Tila maging langit ay nakikiramay sa akin
Ipinaghele ako ng nahugasang hangin
Sa isang mundong ika'y aking kapiling
Ngunit sa pagputok ng bukang-liwayway
Malulusaw ang pangitaing sa tabi ko'y nakahimlay
Tinanaw ko ang napaliguang kalunsuran
Basa ng ulan angbawat bubungan
Basa ang damit na naiwan ko sa sampayan
Basa ng tubig ang mga puno't halaman
Basa ng luha ang aking unan
Ngunit sa kaibuturan
Ako'y nananatiling...
Tigang.
Mag-subscribe sa:
I-post ang Mga Komento (Atom)
Walang komento:
Mag-post ng isang Komento